ریاض۔3 اکتوبر (اے پی پی) وفاقی وزیر آئی ٹی و ٹیلی کام شزہ فاطمہ خواجہ دی سعودی ٹیلی کام کمپنی دے حکام نال ملاقات تھئی اے تے پاکستان وچ فائبر نیٹ ورک، کلائوڈ، سائبر سکیورٹی تے فِن ٹیک تے تعاون تے ڳالھ مہاڑ کیتی ڳئی ۔ وزارت آئی ٹی و ٹیلی کام توں جاری بیان موجب ملاقات وچ کاروباری موقع تے سرمایہ کاری دے امکانات تے توجہ ݙتی ڳئی۔ ملاقات وچ پاکستان دی کنیکٹ پاکستان 2030 پالیسی دے تناظر وچ ایس ٹی سی دے نال شراکت داری تے غور کیتا ڳیا۔ پاکستان وچ فائبر نیٹ ورک، کلائوڈ، سائبر سکیورٹی تے فِن ٹیک تے تعاون تے وی ڳالھ مہاڑ تھئی۔ پاکستانی آئی ٹی مارکیٹ دی 3.8 ارب ڈالر ایکسپورٹ تے 200 ملین موبائل صارفین کوں سرمایہ کاری کیتے پرکشش قرار ݙتا ڳیا۔ ایں موقع تے فِن ٹیک تے گھٹ لاڳت کراس بارڈر پیمنٹس تے ڳالھ مہاڑ تھئی ۔ ملاقات وچ پاکستان دے خطے وچ ریجنل ٹرانزٹ ہب دے کردار کوں تکڑا بݨاوݨ تے زور ݙتا ڳیا۔ ایں موقع تے جی سی سی، ایشیا تے افریقہ کوں کنیکٹ کرݨ وچ پاکستان دی سٹریٹجک اہمیت کوں اُجاگر کیتا ڳئے۔ سب میرین کیبلز تے ڈیجیٹل کنیکٹیویٹی منصوبیں وچ شراکت داری دے موقع تے وی غور کیتا ڳیا۔ ایس ٹی سی سعودی عرب تے جی سی سی دی ساریں توں وݙی ٹیلی کام آپریٹر اے تے وژن 2030 دے ڈیجیٹل ایجنڈے وچ اہم کردار ادا کریندی پئی اے۔
