نیویارک۔26ستمبر(اے پی پی):وفاقی وزیر اطلاعات و نشریات عطاء اللہ تارڑ وزیراعظم شہباز شریف دے اقوام متحدہ جنرل اسمبلی اجلاس نال خطاب کوں تاریخی قرار ݙیندے آکھیے جو وزیراعظم شہباز شریف آپݨے خطاب اچ پوری مسلم امہ دے جذبات دی بھرپور ترجمانی کیتی اتے فلسطین و کشمیر دا مقدمہ مؤثر انداز اچ پیش کیتا، وزیراعظم فلسطینی نیاݨی ہند رجب تے ظلم کوں کربناک قرار ݙتا جیکوں بربریت نال شہید کیتا ڳیا ہا۔ جمعہ کوں نیویارک اچ میڈیا نال ڳالھ مہاڑ کریندے ہوئیں وفاقی وزیر اطلاعات آکھیا جو وزیراعظم شہباز شریف جنرل اسمبلی اجلاس اچ فلسطینی عوام دی بھرپور ترجمانی کیتی اتے انہاں دا مقدمہ دنیا دے سامݨے رکھیا جیںدے تے جنرل اسمبلی اچ موجود نمائندیاں وزیراعظم دے خطاب کوں وݙا پسند کیتے۔ انہاں آکھیا جو وزیراعظم بھارت دے قبضے ہیٹھ دٻیے کشمیر دا مقدمہ وی وݙے مؤثر طریقے نال اڳونہا کیتا اتے بھارتی جارحیت اچ شہید تھیوݨ آلے ست سالہ معصوم نیاݨے ارتضیٰ عباس دا خصوصی ذکر کیتا۔ انہاں آکھیا جو وزیراعظم بھارتی جارحیت دے پس منظر اچ دنیا کوں ݙسیا جو فیلڈ مارشل سید عاصم منیر دی قیادت اچ پاکستان دی بہادر مسلح افواج بھارت کوں عبرتناک شکست ݙتی، اساں بھارت دے ست جنگی طیارے ݙھوائن، وزیراعظم متاثر کن انداز اچ اقوام عالم دے سامݨے اہم نکات پیش کیتے، وزیراعظم دنیا دے سامݨے موسمیاتی تبدیلی توں نقصانات دا معاملہ وی اجاگر کیتا۔
