اسلام آباد۔23جولائی (اے پی پی) وزیرِ اعظم شہباز شریف ملکی برآمدات سالانہ 60 ارب ڈالر تئیں پڄاوݨ دا ہدف ݙیندیں ہوئیں ہدایت کیتی جو برآمد کنندگان دے مسئلے ݙو ہفتے اچ حل کیتے ونڄن۔ وزیر اعظم آفس دے میڈیا ونگ توں جاری بیان موجب اے ہدایت وزیراعظم منگل کوں آپݨی صدارت قومی ترقیِ برآمدات بورڈ (National Export Development Board) دے اجلاس اچ ݙتی۔اجلاس اچ نائب وزیرِ اعظم و وزیرِ خارجہ اسحاق ڈار، وفاقی وزرا جام کمال خان، احد خان چیمہ، قیصر احمد شیخ، عبدالعلیم خان، احسن اقبال، رانا تنویر حسین، محمد اورنگزیب، سردار اویس خان لغاری، ڈاکٹر مصدق ملک، وزراءِ مملکت علی پرویز ملک، شزہ فاطمہ خواجہ، ڈپٹی چیئرمین پلاننگ کمیشن جہانزیب خان، گورنر سٹیٹ بنک، وزیرِاعظم دے کوارڈینیٹر رانا احسان افضل چیئرمین ایف بی آر، متعلقہ افسرتے وݙی تعداد اچ مختلف شعبیاں اچ بشمول ٹیکسٹائل، انفارمیشن ٹیکنالوجی، لیدر، زراعت توں تعلق رکھݨ آلے برآمدکنندگان شریک تھیے۔ شرکا برآمدی صنعت تے خصوصی توجہ ݙیوݨ تے وزیراعظم دا شکریہ ادا کیتا۔اجلاس کوں حکومت ولوں برآمدی صنعت دے ودھارے کیتے ڳئے اقدامات تے بریفنگ ݙتی ڳئی۔ اجلاس کوں ݙسیا ڳئیا جو ایں سال پاکستان دی برآمدات 30 ارب ڈالر توں ودھ ڳئن جئیں کوں ݙوگنا کرݨ کیتے آندے پںج سالیں دا منصوبہ پیش کیتا ڳئے۔ اجلاس اچ وزیرِ اعظم شہباز شریف ملکی برآمدات کوں 60 ارب ڈالر سالانہ تے پڄݨ دا ہدف ݙتے۔ وزیراعظم آکھیا جو وزارتِ تجارت تے متعلقہ ادارے آندے ترائے سالیں اچ برآمدات دے 60 ارب ڈالر دے ہدف کیتے عملی کم کرن۔ الحمد اللہ گزریل مالی سال ملکی برآمدات 30 ارب ڈالر توں ودھ رہن۔ حکومتی پالیسیاں پاروں انفارمیشن ٹیکنالوجی برآمدات 3.2 ارب ڈالر توں ودھ ڳئن۔ وزیراعظم ہدایت کیتی جو برآمد کندگان دے نشاندہی کر تے مسئلیاں کوں آندے ݙو ہفتے اچ حل کر تے رپورٹ پیش کیتی ونڄے۔ وزیراعظم ہدایت کیتی جو وزارت تجارت برآمدات دی استعداد رکھݨ آلے شعبیاں دے نمائندیاں نال رَل تے پالیسی تجاویز کوں چھیکڑی شکل ݙیوے۔ زرعی برآمدات اچ ٻئے ودھارے کیتے وزارت قومی غذائی تحفظ صوبیاں نال رَل تے ایکسٹینشن سروسز دی بہتری کیتے کم کرے۔ وزیراعظم ہدایت کیتی جو برآمدات دی شپنگ بارے مسئلیاں کوں فوری حل کر تے یورپ تے امریکا پاکستانی سامان ٻھیجݨ دا دورانیہ ڳھٹ کیتا ونڄے۔ وزیراعظم آکھیا جو پاکستانی شئہیں دی برآمدات ودھاوݨ اتے انہاں دی سنڄاݨ ٻݨاوݨ کیتے ریسرچ اینڈ ڈویلپمنٹ، جدت ات برانڈ ڈویلپمنٹ تے کم کیتا ونڄے۔ ایف بی آر ولوں برآمد کندگان دے ریفنڈز اچ کہیں قسم دا تعطل قبول نی کیتا ویسی۔ وزیراعظم ہدایت کیتی جو دنیا اچ پاکستانی سفارتخانیاں اچ ٹریڈ آفیسرز انہاں ملکاں اچ پاکستانی شئیں دی برآمد اتے پاکستانی برآمد کرݨ آلیاں دی رہنمائی کرن۔ وزیراعظم آکھیا جو صنعتاں کیتے بجلی دی لاگت کوں ڳھٹ کرݨ کیتے وزارت بجلی ہک جامع منصوبہ پیش کرے۔ نجی شعبے دی مسئلیاں دے حل کیتے انہاں کوں پالیسی ٻݨاوݨ دے عمل دا حصہ ٻݨایا ونڄے۔ برآمدی صنعتاں دے نمائندیاں وزیراعظم کوں مسئلیاں دے حل کیتے تسلسل نال ملاقاتاں تے خراج تحسین پیش کیتا۔ اجلاس دے شرکا آکھیا جو وزیراعظم دی برآمدی شعبے اچ خصوصی دلچسپی صںعتکاراں کیتے حوصلہ افزا اے۔ برآمد کنندگان وزیراعظم دے برآمدی صنعت کوں ایف بی آر ولوں ویلھے تے ریفنڈ کرݨ دی وی تعریف کیتی۔
