راولپنڈی۔ 1 اکتوبر(اے پی پی)سکیورٹی فورسز دے بلوچستان اچ 2 انڄھ انڄھ آپریشناں اچ فتنہ الہندوستان دے 13 دہشت گرد ماریے ڳئے۔ آئی ایس پی آر دے مطابق 30 ستمبر اتے 1 اکتوبر 2025ء کوں بلوچستان وچ ݙو انڄھ انڄھ آپریشن کیتے ڳئے۔ کوئٹہ ضلعے اچ خوارج دی موجودگی دی اطلاع تے انٹیلی جنس بنیاداں تے آپریشن کیتا ڳیا۔ آپریشن اچ سکیورٹی فورسز خوارج دے ٹھکانے کوں موثر انداز اچ نشانہ بݨایا، شدید فائرنگ دے تبادلے دے بعد فتنہ الہندوستان دے 10 دہشت گرد واصل جہنم کر ݙتے ڳئے۔ ہک ٻیا انٹیلی جنس بیسڈ آپریشن (آئی بی او) کیچ ضلعے اچ کیتا ڳیا جیندے اچ دہشت گرداں دا ٹھکانہ تباہ کیتا ڳیا اتے فتنہ الہندوستان نال تعلق رکھݨ والے 3 دہشت گرد ہلاک کر ݙتے ڳئے۔ ماریے ڳئے دہشت گرداں دے قبضے توں اسلحہ، گولہ بارود اتے دھماکہ خیز مواد وی برآمد تھیا۔ اے دہشت گرد علاقے اچ کئی تخریبی اتے دہشت گردانہ کارروائیاں اچ ملوث ریہن۔ پاکستان دیاں سکیورٹی فورسز ملک توں بھارتی سرپرستی اچ تھیوݨ والی دہشت گردی دے ناسور کوں جڑ توں مکاوݨ کیتے پرعزم ہین اتے قوم دے ایں غیر متزلزل عزم دا اعادہ کریندن جو دہشت گرداں اتے انہاں دے سہولت کاراں کوں ہر صورت انصاف دے کٹہرے اچ گھن آیا ویسی۔
