ملتان۔19 ستمبر (اے پی پی) جلال پور پیر والا اچ چھل متاثرین کیتے ریسکیو آپریشن ہالی وی جاری اے۔ ریسکیو 1122 دیاں ٹیماں ݙینھ رات متاثرہ علاقیں اچ سرگرم ہن اتے شہریاں کوں محفوظ جہیں تئیں منتقل کرݨ کیتے ہر ممکن اقدامات کریندیاں پئن۔ ریسکیو حکام موجب جلالپور دعا چوک، بہادر پور، وستی خان بیلہ، بستی جعفرہ، وستی بیٹھ کیچ، وستی پونٹا، بستی مہاݨہ سندیلہ اتے وستی کرموں آلی سودھے مختلف وستیاں اچ لوکاں کوں کڈھݨ دا عمل جاری اے۔ گزریل 24 گھنٹے اچ جلال پور پیر والا اچ کہیں وی شہری کوں نی کڈھیا ڳیا، 874 ٹرانسپورٹیشن کیس رجسٹرڈ کیتے ڳئن، جانوراں دی ریسکیو رپورٹ ایں دوران صفر رہی۔ ہݨ تئیں کل ملا تے 24 ہزار 942 لوکاں، 3 ہزار 726 ٹرانسپورٹیشن کیساں اتے 5 ہزار 114 جانوراں کوں محفوظ جہیں تے منتقل کیتا ڳئے۔ ریسکیو اہلکار کِشیاں اتے حفاظتی اقدامات دے نال نیاݨیاں، تریمتاں اتے وݙیاں کوں ترجیح تے محفوظ جہیں تئیں پڄیندے پئن۔ ریسکیو حکام آکھیا جو اوکھے ویلھے اچ عوام کوں کلھا نہ چھوڑیا ویسی اتے ہر ممکن تعاون جاری رہسی۔
.jpg)
