کوئٹہ۔29 مارچ (اے پی پی) وزیراعظم عمران خان آکھیا جو بلوچستان دی عوام دے مسئلے انہاں دے در تے حل کرنڑ سانگے مقامی حکومتاں دا مضبوط نظام ضروری اے،ملک کوں فرسودہ نظام توں کڈھ کراہیں حقیقی تبدیلی آلے پاسے گھدی ویندوں،آونڑ آلے الیکشن سانگے نی ملک دی ترقی دے ایجنڈ تے عمل کریندے پیوں،ملک اچ ایجھی ترقی چاہندوں جئیں نال سارا پاکستان ترقی کرے،بلوچستان دی ترقی نال پورا ملک ترقی کریسی،سی پیک دے مغربی روٹ کوں تکھے ترقی ڈیونڑ دی لوڑھ اے،بلوچستان دی عوام سانگے پاک فوج اتے صوبائی حکومت نال رل تے کینسر انسٹی ٹیوٹ بنڑیسوں،کوئٹہ دی پائیدار ترقی سانگے ماسٹر پلان ضروری اے۔او جمعہ کوں اتھاں سی پیک مغربی روٹ سانگے 305 کلومیٹر کوئٹہ ژوب ڈبل کیرج وے اتے بلوچستان ہیلتھ کمپلیکس دے منڈھ بدھنڑ دی تقریب توں خطاب کریندے پے ہن ۔خطاب کریندیں ہوئیں انہاں آکھیا جو میکوں خوشی تھیندی پی اے جو بلوچستان اچ ایجھا وزیراعلیٰ اے جیڑھا لوکاں دا درد رکھیندے۔انہاں آکھیا جو اساں جینکوں نواں پاکستان آکھدوں اوں اچ ہک ایجھی سوچ ہئی جیڑھے جو پرانڑے اتے فرسودہ رستے تے چلدی پی ہئی ،اے سوچ بئی اگوں نی ودھ سگدی،پرانڑے طریقے نال چلنڑ نال پاکستان کنگال تھی گئے ۔انہاں آکھیا جو ساکوں گزریل حکومتاں تے گھدے ہوئے قرضیاں تے روز چھی ارب روپے سود ڈیونڑاں پمدا پے ،جینویں ملک چلدا پیا ہئی اگوں تباہی دے سوا کجھ کائنا ہئی ۔انہاں آکھیا جو بلوچستان ہک سپیشل کیس اے،اتھاں سیاست صرف الیکشن جتنڑ سانگے تھیندی رہی اے،پچھلے وزیراعظم پنج سال بلوچستان دی بجائے لندن دے دورے کریندے رہے۔وزیراعظم آکھیا جو پاک فوج دے سربراہ جنرل قمر جاوید باجوہ دا شکریہ ادا کرینداں جنہاں دی ذاتی کوششاں نال یو اے ای دی فنڈنگ نال کوئٹہ اچ کارڈیک انسٹی ٹیوٹ بنڑایا گئے ۔ایں موقع تے وزیراعلیٰ بلوچستان جام کمال خان وی تقریب نال خطاب کیتا۔
