اسلام آباد۔12جولائی(اے پی پی)وزیر اعظم محمد شہباز شریف دی دعوت تے آذربائیجان دے صدر 11 توں 12 جولائی تئیں پاکستان دا سرکاری دورہ کیتے، صدر دے وفد اچ وزرائے دفاع، دفاعی صنعت، اقتصادیات، ڈیجیٹل ڈویلپمنٹ اتے ٹرانسپورٹ اتے نائب وزیر خارجہ شامل ہن۔ ترجمان دفتر خارجہ آکھیے جو صدر علیوف دا وزیراعظم محمد شہباز شریف شاندار استقبال کیتے اتے انہان کوں وزیراعظم ہائوس اچ سلامی ݙتی ڳئی، آذربائیجان دے صدر قومی یادگار تے پھلاں دی چادر چڑھائی۔
آذربائیجان دے صدر الہام علیوف صدر مملکت آصف علی زرداری اتے وزیر اعظم محمد شہباز شریف نال ملین۔ ݙوہاں فریقاں باہمی دلچسپی دے شعبیاں اتے ݙوطرفہ تعاون تے الایا اتے باہمی ڳانݙھا ٻیا تکڑا کرݨ تے اتفاق کیتے۔ ملاقات اچ ݙوہاں رہنماواں پاکستان اتے آذربائیجان وچال سٹریٹجک شراکت داری دا عزم کیتے اتے ݙوطرفہ سیکورٹی و دفاعی تعاون تے اطمینان کریندے پاکستان، آذربائیجان اتے ترکی وچال سہ فریقی سربراہی اجلاس دی سطح دے طریقہ کار کوں تریے ملکاں وچال تعلقات اچ ہک نویں دور دی شروعات قرار ݙتے۔
ISLAMABAD: July 12 – President of Azerbaijan, Mr. Ilham Aliyev, called on President Asif Ali Zardari, at Aiwan-e-Sadr. APP/MAF/FHA
بیان دے مطابق فریقین ݙوطرفہ تجارت و سرمایہ کاری ٻئی ودھاوݨ اتے توانائی، انفراسٹرکچر، رابطے اتے دفاعی صنعت دے شعباں اچ مشترکہ سرمایہ کاری دے منصوبے ٻݨاوݨ تے وی اتفاق کیتے۔ وزیراعظم آکھیے جو ٻئے معاہدیاں اتے پروٹوکولز دے علاوہ ترجیحی تجارتی معاہدے اتے ٹرانزٹ ٹریڈ ایگریمنٹ دی تکمیل دے بعد ݙوہاں ملکاں ݙوطرفہ تجارت ودھاوݨ دا عزم کیتے اتے کثیرالجہتی فورمز بالخصوص اقوام متحدہ اتے او آئی سی تے ݙوطرفہ تعاون دی سطح تے اطمینان کیتے۔ صدر الہام علیوف تنازعہ جموں و کشمیر تے آذربائیجان دے اصولی موقف اتے اقوام متحدہ دی سلامتی کونسل دیاں متعلقہ قرارداداں دے مطابق کشمیری عوام دے حق خودارادیت دی حمایت دا اعادہ کیتے۔ ݙوہاں رہنماواں معاہداں اتے مفاہمت دی یادداشتاں تے دستخط دی تقریب اچ شرکت کیتی۔
قونصلر امور، نجکاری، راہداری و ترجیحی تجارت، قانونی تعاون، معدنی وسائل، ثقافتی تبادلے اتے ادب، انفارمیشن اینڈ کمیونیکیشن ٹیکنالوجی، نشریات، سائنسی و تکنیکی تعاون، سیاحت، فضائی خدمات، جڑواں شہر اتے چھوٹے و درمیانے درجے دے انٹرپرائز دی ترقی دے شعبیاں اچ تعاون دے 15 معاہداں اتے مفاہمت دی یادداشتاں تے دستخط کیتے گئن۔
